Artıq 30 ilə yaxındır ki, Azərbaycan Respublikasının ərazisi arxasında Böyük dövlətlərin dayandığı erməni qəsbkarlarının təcavüzünə məruz qalmış, minlərlə soydaşımız öz tarixi torpaqlarından didərgin salınmışdır. XIX əsrin I qərinəsində ermənilərin kütləvi şəkildə Şimali Azərbaycan torpaqlarında məskunlaşdırılması, böyük güc mərkəzləri tərəfindən 1918-ci ildə onlara tarixi torpaqlarımız hesabına dövlət yaradılması və torpaqlarımızın bir hissəsinin ermənilərə pay verilməsi ilə nəticələndi. Bu prosesin sonrakı inkişafının nəticələri isə daha acınacaqlı oldu: xalqımıza qarşı tarixdə analoqu olmayan kütləvi soyqırımları (1918-1920-ci illər, 1992-ci il 26 fevral), Şimali Azərbaycan əhalisinə qarşı deportasiyalar, mədəniyyətimizin, tarixi abidələrimizin və toponimlərimizin total şəkildə məhv edilməsi, əliyalın xalqımızın doğma torpaqlarından silah gücünə didərgin salınaraq tarixdə görünməmiş vəhşiliklərə məruz qalması və s. bu kimi proseslər həyata keçirildi.
Bu gün Cənubi Qafqazla bağlı ənənəvi siyasət yenə davam etdirilir. Böyük dövlətlər Cənubi Qafqazda öz mövqelərini saxlamaq üçün yenə “erməni kartından” istifadə etməkdədirlər. Havadarları tərəfindən hərtərəfli müdafiə olunan ermənilər işğal etdikləri Azərbaycan ərazisində ikinci bir erməni dövləti yaratmağa çalışırlar. Azərbaycan Respublikasının Prezidenti cənab İlham Əliyev real tarixi həqiqətlərə və ilk mənbələrə əsaslanaraq dəfələrlə bütün dünyaya birmənalı şəkildə və qətiyyətlə bəyan etmişdir ki, ermənilər Azərbaycan Xalq Cümhuriyyətinin onlara verdiyi İrəvan və ətraflarını əhatə edən Azərbaycan torpaqlarında bir dəfə özlərinə dövlət yaratmışlar. Azərbaycan öz ərazisində təcavüzkar Ermənistana ikinci erməni dövləti yaratmağa imkan verməyəcəkdir.[1]
Ermənilərin Azərbaycan torpaqlarına köçürülməsi məsələsi hələ XVIII əsrin əvvəllərindən başlayaraq Cənubi Qafqazda möhkəmlənmək, Azərbaycanın Osmanlı dövləti və İranla sərhədində yerləşən torpaqlarında bufer xristian dövləti yaratmaq niyyəti güdən Rusiya imperiyasının çoxdankı işğalçılıq planlarının tərkib hissəsi idi.
Lakin işğal olunmuş Cənubi Qafqaz bölgəsində ermənilərin sayca azlıq təşkil etməsi Rusiya imperiyasının İran və Osmanlı sərhədində bufer xristian dövləti yaratmaq planlarına tamamilə uyğun gəlmirdi. Qriqoryan missionerləri istisna edilməklə ermənilərin Azərbaycan torpaqlarına, o cümlədən İrəvan bölgəsinə köçüb gəlməsi prosesi 1441-ci ildə erməni katolikosluğunun Kilikiyadan Azərbaycan Qaraqoyunlu dövlətinin ərazisinə – Üçkilsəyə köçürülməsindən sonra başlamışdı. Belə ki, Qaraqoyunluların hakimiyyəti dövründə Çuxursəd vilayətinin tarixində sonralar bütün Azərbaycan üçün son dərəcə ağır problemlər yaradan bir hadisə də baş verdi: Qaraqoyunlu hökmdarı Cahanşahın icazəsi ilə 1441-ci ildə erməni katolikoslarının fəaliyyət mərkəzi Kilikiyanın Sis şəhərindən İrəvan yaxınlığındakı Üçkilsə (Üçmüədzin*) monastırına köçürüldü.[2] Bununla Cənubi Qafqazda qriqoryanlığı yayan erməni missionerləri üçün əlverişli şərait yarandı.
Erməni katolikosluğunun Qaraqoyunlu ərazisinə köçürülməsindən sonra Qriqoryan kilsəsinin müxtəlif vasitələrlə Azərbaycan türklərinə məxsus torpaqları ələ keçirməsinə və zaman-zaman erməniləri burada yerləşdirməsinə[3] baxmayaraq, ermənilər Çuxursəd (İrəvan) bölgəsində say etibarilə həmişə cüzi azlıq təşkil edirdilər.
XVIII əsrin əvvəllərində İrəvan şəhərində oturaq erməni əhalisinin yaşamadığını həmin dövrdə tərtib olunmuş arxiv sənədləri də təsdiq edir. İsrail Ori rus qoşunlarını Cənubi Qafqaza yürüşə cəlb etmək və Azərbaycan torpaqlarına işğalına həvəsləndirmək üçün I Pyotra təqdim etdiyi 1701-ci il 25 iyul tarixli xüsusi məlumatnında («Памятных записках») 18 bənddən ibarət bir layihə hazırlamışdı. Layihənin 7-ci bəndində Rusiya imperatoruna İrəvan şəhəri haqda kəşfiyyat xarakterli məlumatlar çatdırılır və qeyd olunur: “İrəvan şəhərində cəmi 300 nəfərdən bir az artıq erməni yaşayır və onlar da ticarətlə məşğul olurlar”. [4]
Uzun müddət ara vermiş Səfəvi-Osmanlı müharibəsinin XVIII əsrin I rübünün sonlarında yenidən başlaması Çuxursəd (İrəvan) və Gəncə-Qarabağ bölgələrində türk-müsəlman əhalisinin yaşadığı məskənlərini məcburən tərk etməsi ilə nəticələndi. Osmanlı hakimiyyət nümayəndələri yerli şiə əhaliyə qarşı münasibətdə barışmaz mövqedə olduğu halda, qeyd etdiyimiz bölgələrin xristian əhalisinə son dərəcə dözümlülük nümayiş etdirmişdir.
Məsələn, osmanlı ordusu tərəfindən İrəvan qalasının mühasirəsi (6 iyul — 7 oktyabr 1724-cü il) zamanı Vətən torpağının müdafiəsinə qalxan bütün Çuxursəd əhalisi başda bəylərbəyi Əliqulu xan olmaqla Osmanlı qoşunlarına şiddətli müqavimət göstərdi.[5] Üçkilsə və onun ətrafında məskunlaşan, əsasən qriqoryan missionerlərindən ibarət olan ermənilər isə öz vətənləri olmadığı üçün osmanlı ordusuna müqavimət göstərmədilər. Üçkilsə katolikosu Osmanlı paşasına Səfəvi şahı Təhmasib haqqında qeyri-dəqiq məlumatlar çatdırmaqla yanaşı, həm də İrəvan qalasının müdafiəçilərini təslim olmağa çağırdı.[6] Bu “xidmət” müqabilində ermənilər Sultan III Əhməd tərəfindən onlar barədə xüsusi fərmanının verilməsinə nail oldular. Sultan III Əhmədin Arif Əhməd paşaya göndərdiyi fərmanda ermənilərin dini mərkəzi olan Üçkilsəyə hücum etmək qadağan olunur, onun dağıntıya və sakinlərinin qarətə məruz qalmasına yol verilməməsi tələb olunurdu. Hətta, Arif Əhməd paşa Sultanın fərmanına uyğun olaraq Üçkilsənin qorunması üçün xüsusi bir alay da ayırdı.[7]
Digərbir misal, 1725-ci ildə Gəncə uğrunda döyüşdən sonra osmanlılar şəhərə daxil olan zaman şəhər əhalisi ətraf kəndlərə və bölgələrə çəkilməyə məcbur olur. Osmanlılar isə Gəncədə xüsusi məhəllə yaradaraq oranı digər yerlərdən köçürdükləri ermənilərlə məskunlaşdırmışlar.[8]
Beləliklə, istər İrəvan, istərsə də Gəncə-Qarabağ bölgəsində türk-müsəlman əhalinin doğma torpaqlarını tərk etməsi Osmanlı hakimiyyətini qəbul edən yerli xristian albanlar və Osmanlı ərazisindən Səfəvi torpaqlarına gələn ermənilər tərəfindən torpaqlarımızın satın alınması ilə nəticələndi.
Ermənilər tərəfindən Rusiyaya və Avropanın digər xristian dövlətlərinə çatdırılan məlumatlarda Cənubi Qafqazda, o cümlədən Şimali Azərbaycanda yaşayan erməni əhalisinin sayı həmişə təhrif olunmuş və süni şəkildə şişirdilmişdir. Məsələn, İrəvan bölgəsində erməni əhalisinin cüzi bir azlıq təşkil etməsini hələ XVIII əsrin sonlarında tərtib olunmuş arxiv sənədləri ilə erməni tarixçisi V.Qriqoryan “İrəvan xanlığı XVIII əsrin sonlarında (1780-1800)” adlı əsərində təsdiq edir. 1783-cü ildə Rusiya nümayəndəsi Pavel Potyomkin İrəvan xanlığı ərazisində yaşayan ermənilərin adından ona məktub gətirən erməni nümayəndəsindən bu məktubun üzərində Üçkilsə katolikosunun möhür və imzasının niyə olmadığını soruşduqda: “Katolikos bütün dünyaya səpələnmiş ermənilərin ruhani başçısı olduğundan o öz möhürünü Ararat ölkəsində yaşayan bir qrup erməninin məktubu üzərinə vura bilməz”.[9] – cavabını vermişdi.
Göründüyü kimi, XVIII əsrin sonlarında tərtib olunan ermənidilli arxiv sənədlərində belə İrəvan xanlığı ərazisində yaşayan ermənilər sayca çox az olduğu üçün onlar xalq deyil, bir qrup adlandırılırdı.
I Pyotr (1682-1725) dövründən başlayaraq ermənilərdən bir alət kimi yararlanmaq niyyəti güdən Rusiya imperiyası hər zaman erməniləri tarixi Azərbaycan torpaqlarında məskunlaşdırmağa çalışmışdır. “Ararat patriarxı haykanlı arxiyepiskop İosif” imzası ilə knyaz Q.A.Potyomkin-Tavriçeskiyə yazılmış 1784-cü il 28 aprel tarixli məktub bunu bir daha sübut edir. Arxiyepiskop İosif “ermənilərin İrəvan ətrafında məskunlaşmasına yardım etdiyi üçün” knyaz Q.A.Potyomkinə xüsusi təşəkkürünü bildirirdi.[10]
Erməni ideoloqları isə qriqoryan kilsəsinin xüsusi tapşırığı ilə İrəvan xanlığı ərazisində məskunlaşan ermənilərin azlıq təşkil etməsini ört-basdır etmək üçün Rusiya hakim dairələrinə göndərilən məktublarında onların sayını xüsusi məqsədlə süni şəkildə artırırdılar. Məsələn, İrəvandakı erməni icmasının başçısı S.Ter-Sahakyan etiraf edir ki, Hovsep Arqutyanın tapşırığına görə o, 1784-cü ilin dekabrında knyaz Qriqori Potyomkinə ünvanladığı məktubunda “ermənilərin sayını 9 dəfədən çox şişirdərək göstərmişdir”.[11]
XIX əsrin əvvəllərində Cənubi Qafqazın işğalında ermənilərdən bir vasitə kimi istifadə edən Rusiya imperiyası artıq ələ keçirdiyi Cənubi Qafqaz bölgəsində möhkəmlənmək üçün erməniləri kütləvi şəkildə bu bölgədə məskunlaşdırmağı dövlət siyasətinə çevirdi. Rusiya imperiyasının işğalını həyata keçirənlər həm də işğal etdikləri bu və ya digər bölgədə Rusiyaya qarşı etirazların zəiflədilməsi üçün erməni əhalisinin köçürülməsini əsas vəzifələrdən biri kimi qarşılarına qoyurdular. Qafqazdakı rus qoşunlarının baş komandanı P.D.Sisianov 1804-cü ilin yanvarında Gəncəni ələ keçirdikdən sonra bura ermənilərin yerləşdirilməsinə cəhd göstərdi. Artıq 6 fevral 1823-cü il tarixli məlumata görə Gəncə şəhərində yaşayan 6.730 nəfərdən 3.875-i müsəlman, 2.855 nəfəri isə erməni idi.[12]
Eyni siyayətin Qarabağ bölgəsində də davam etdiyini dövrün sənədlərində izləmək mümkündür. Gəncəni ələ keçirən P.D.Sisianov bi az keçmiş, 1805-ci il mayın 22-də, 19 saQylı raportunda yazırdı: “Qarabağ özünün coğrafi mövqeyinə görə Azərbaycanın, eləcə də İranın qapısı hesab edilir, buna görə də onu itaətdə saxlamalı və burada mövqeyimizi möhkəmlətməyə daha çox cəhd göstərməliyik”.[13] Belə bir məqsəd tezliklə həyata keçirildi. 1805-ci il mayın 14-də Qarabağ xanı İbrahim xanla general Sisianov arasında müqavilə imzalandı.[14]
İşğal olunmuş Cənubi Qafqaz bölgəsində ermənilərin sayca azlıq təşkil etməsi səbəbindən Rusiya imperiyası erməniləri kütləvi şəkildə Azərbaycanın Osmanlı dövləti və Qacarlar İranı ilə sərhədində yerləşən ərazilərə köçürməyə qərar verdi. Bu barədə İ.Yenikolopov yazır: “arxiv sənədlərinin tədqiqi təsdiq edir ki, ermənilərin arzuları ilə üst-üstə düşən köçürmə məsələsi tezliklə çar hökumətinin ən mühüm tədbirinə çevrildi. Bununla da, Rusiya hökumətinin İranla sərhədboyu ərazilərə 80 min kazakın köçürülməsi barədə əvvəllər hazırladığı layihə qüvvədən salındı”. Bu layihəyə qarşı çıxan A.Qriboyedov yeni zəbt olunmuş ərazilərə erməniləri məskunlaşdırmağa üstünlük verdi.[15]
Ermənilərin Şimali Azərbaycan torpaqlarına köçürülməsi layihəsi hələ 1827-ci ildə A.Qriboyedovun başçılıq etdiyi Cənubi Qafqaz diyarının diplomatik dəftərxanasında işlənib hazırlanmışdı. Rusiyanın İrandakı nümayəndəsi A.Qriboyedov İran ermənilərinin yenicə işğal edilmiş Şimali Azərbaycan torpaqlarına köçürülməsi layihəsinin həyata keçirilməsində fəal iştirak edirdi. İ.Yenikolopova görə, A.Qriboyedov ermənilərin İrandan Rusiya sərhədlərinə, yəni Çuxursəd çökəkliyinə köçürülməsinə xüsusi diqqətlə yanaşır və bu məsələyə Rusiyanın Şərqdəki mövqelərinin möhkəmlənməsinin təminatı kimi baxırdı. Bundan əlavə, hələ XVIII əsrin əvvəllərindən başlayaraq Rusiyanın Cənubi Qafqaz torpaqlarında erməni məskənləri yaradılması layihəsi A.S.Qriboyedova yaxşı məlum idi və o, İrandan ermənilərin köçürülməsi planının həyata keçirilməsi üçün Qaraziyyədində Rusiya və İran arasında aparılan danışıqlara da böyük əhəmiyyət verirdi. Rusiya və İran arasında gedən Dehqarqan danışıqlarında ortaya qoyulan ermənilərin köçürülməsi məsələsi Türkmənçay müqaviləsində qəti həllini taparaq onun 15-ci və 16-cı maddələrində əks olundu.[16]
Qafqazı ələ keçirmək uğrunda apardığı müharibələrdə Qacarlar İranı və Osmanlı imperiyasına qalib gələn çar Rusiyası bu dövlətlərin ərazisində yaşayan erməniləri kütləvi surətdə Şimali Azərbaycan torpaqlarına köçürməyə başladı. İlk öncə bu proses qacarlar İranının Rusiyanın işğal etdiyi Azərbaycan torpaqları sərhədində yaşayan ermənilərin köçürülməsi ilə başladı. General Paskeviç 1828-ci ilin yanvarda yazır ki, xristianları çox da bəsləməməliyik ki, iranlıları özümüzə qaldırmayaq.[17]
Rusiya tərəfinin təkidi ilə 1828-ci il fevralın 10-da Cənubi Azərbaycanın Türkmənçay kəndində Qacarlar İranı və Rusiya imperiyası arasında bağlanmış eyniadlı müqavilənın XV maddəsinə əsasən İran ərazisində yaşayan ermənilərin kütləvi şəkildə Azərbaycan torpaqlarına köçürülməsi rəsmiləşdirildi.[18] Həmin maddəyə görə şah öhdəsinə götürürdü ki, o, ölkədə yaşayan məmur və sakinlərə bu gündən başlayaraq, öz ailəsi ilə birlikdə İran vilayətindən Rusiyaya sərbəst keçmək, hökumət və yerli rəisliyin heç bir maneçiliyi olmadan onların satlıq malına və ya əmlakına, əşyalarına hər hansı gömrük və vergi qoyulmadan daşınan əmlakını aparmaq və satmaq üçün bir il vaxt verir. Daşınmaz əmlaka gəldikdə isə, onun satılması və ya onun haqqında öz xoşuna sərəncam üçün beşillik müddət müəyyən edilir.[19]
Çarizm Şimali Azərbaycan torpaqlarını işğal etdikcə, bu torpaqlarda möhkəmlənmək üçün həm də əhalinin erməniləşdirilməsi siyasətini də həyata keçirirdi. 1828-ci il Türkmənçay müqaviləsindən sonra bu hal daha müntəzəm və məqsədyönlü xarakter aldı.[20] Türkmənçay müqaviləsinin XV maddəsinə görə şah hökuməti müharibə dövründə öz dövlətinə xəyanət edərək ruslara xidmət etmiş şəxslərin (ermənilərin –, G.N.) Rusiya tabeliyində olan ərazilərə köçmələrinə mane olmamalı idi. Bununla da, İranda yaşayan ermənilərə sərbəst surətdə Rusiyanın himayəsinə keçmək hüququ verildi.[21]
Rusiya imperiyası ermənilərin İrandan Şimali Azərbaycan torpaqlarına köçürülməsini sistemli şəkildə həyata keçirmək üçün Peterburqda yaşayan polkovnik Lazarevi (Qazaros Lazaryan – red.) 1827-ci il oktyabrın 19-da Təbrizə komendant təyin etdi.[22]
General Paskeviçin Peterburqdan xüsusi tələbnamə əsasında ermənilər arasında böyük nüfuza malik olan Qazaros Lazaryanı öz sərəncamına götürməsi ilə köçürülmənin hazırlıq işlərinə başlandı. Təbrizin və Dehqarqanın rus qoşunları tərəfindən tutulmasından sonra o bu ərazilərin komendantı təyin olundu.[23] Oktyabrın 13-də rus qoşunlarının Təbrizə hücumu zamanı onun çağırışı ilə “ruhlanan” ermənilər həmişə olduğu kimi, yenə də yaşadığı dövlətə xəyanət edərək Təbrizin darvazalarını rus qoşunlarına açdılar.[24]
Çar Rusiyası hakim dairələrinin ermənilərin Şimali Azərbaycana köçürülməsi siyasətinin hazırlanmasında erməni din xadimləri də az rol oynamamışdılar. Bu siyasətin həyata keçirilməsi məxfi deyildi və açıq-aşkar surətdə həyata keçirilirdi. Köçürmə planının həyata keçirilməsində bütün ermənilərin katolikosu yepiskop Nerses Həştərəkli öz köməkliyini əsirgəməyəcəyini vəd etmiş,[25] hətta köçürülmənin bütün layihəsini hazırlamışdı.[26] Bununla bağlı Dehkarqan danışıqlarda iştirak edən arxiyepiskop Nerses hətta Rusiya-İran müharibələrinin sülh danışıqlarında ermənilərin də iştirakını tələb edirdi. O, nəinki İran və Türkiyədən, hətta uzaq Hindistanda da ermənilərin Şimali Azərbaycan torpaqlarına köçürülməsini istəyirdi.[27]
General Paskeviç, eyni zamanda, Tiflisin hərbi qubernatoru Sinyaginə 1827-ci ilin dekabrda göndərdiyi məktubunda bildirirdi ki, Urmiya ətrafında yaşayan 15 min aysor və erməni Rusiyanın ələ keçirdiyi yeni bölgələrə köçmək istəyir. Sinyagin isə cavabında onların İrəvan və Naxçıvan əyalətlərində yerləşdirilməsi təklifini irəli sürmüşdü.[28]
Rusiya hakim dairələri çalışırdılar ki, erməni keşişləri vasitəsi ilə Qacarlar İranın müxtəlif əzilərində yaşayan ermənilərin adından tərtib olunmuş xüsusi “xahiş” məktubları göndərilsin. Artıq, 1828-ci ilin əvvəllərindən başlayaraq qraf Paskeviçin ünvanına belə məktublar göndərilməyə başladı. Həmin məktublarda ermənilər özləri Rusiya tərəfindən yeni ələ keçirilmiş vilayətlərə köçürülmələri üçün icazə istəyirdilər.[29]
Diqqəti cəlb edən cəhət budur ki, İrəvan, Naxçıvan və Qarabağ ərazilərinin Azərbaycan torpaqları olduğunu yaxşı bilən erməni başbilənləri Rusiya işğallarından sonra məqsədyönlü olaraq mütəşəkkil surətdə və kütləvi halda ermənilərin məhz bu ərazilərə köçürülməsinə nail olmaq istəyirdilər. Bu icazəni isə məhz imperator özü verməli idi. 1828-cu il aprelin 17-də hərbi nazir Çernışevin Paskeviçə bildirdi ki, imperator ermənilərin İrandan Naxçıvan və İrəvan əyalətinə köçürülməsinə dair bütün təklifləri bəyənmişdir.[30]
Türkmənçay müqaviləsi imzalandıqdan bir neçə gün sonra – 1828-ci il fevralın 14-də Qazaros Lazaryan Türkmənçay kəndindən general Paskeviçə göndərdiyi raportunda xatırladırdı ki, ermənilər müharibə zamanı Rusiyanın qələbəsi üçün mümkün olan hər şeyi ediblər və indi evlərini qoyub Rusiya tərəfə (yəni İrandan Şimali Azərbaycana – G.N.) köçmək istəyirlər. Ermənilərin sürətlə və rahat köçürülməsi üçün o aşağıdakı təklifləri irəli sürürdü: “Birincisi, köçürmə işlərinə rəhbərlik etmək üçün Paskeviç ona yazılı təlimat versin və həmin sənəddə köçənlərə verilən güzəştlər göstərilsin; İkincisi, köçürmə işlərinə rəhbərlik etmək üçün erməni dilini bilən lazımi qədər zabitlər təyin etmək məsələsi onun ixtiyarına verilsin (bununla Q.Lazaryan bu işə erməni zabitlərini cəlb etmək istəyirdi – G.N.); Üçüncüsü, iqlim şəraitinə görə köçürmə işlərinin ləngiyəcəyi yerlərdə rus ordusu dayanıb gözləsin və ordu köçənləri müşayiət etsin; Dördüncüsü, kasıb köçkünlər üçün xəzinədən vəsait ayrılsın”.[31]
Türkmənçay müqaviləsinin XV-XVI maddələri rəsmiləşdikdən sonra general Paskeviç bu təkliflərin yerinə yetirilməsi üçün İrəvan “müvəqqəti idarə”sinə və polkovnik Lazarevə xüsusi təlimat hazırlayıb göndərdi. General Paskevicin İrəvan “müvəqqəti idarə”sinə göndərdiyi təlimatında rus hərbçilərindən və erməni nümayəndələrindən ibarət xüsusi bir komitənin yaradılması, həmin komitənin yalnız İrandan köçürülən ermənilərin yerləşdirilməsi və məskunlaşdırılması ilə məşğul olması, həmçinin köçürülənlərə hər cür diqqət və qayğının təmin edilməsi vurğulanırdı.[32]
29 fevral 1828-ci il tarixində general Paskevic İrəvan müvəqqəti idarəsinə İrandan köçürülən ermənilərin təşkili barədə xüsusi təlimat verdi.[33] Paskeviçin İrəvanın Müvəqqəti idarəsinə göndərdiyi xüsusi təlimatında İrandan köçürülən ermənilərin başlıca olaraq İrəvan və Naxçıvan əyalətlərinə və qismən də Qarabağda yerləşdirilməsi faktını Gürcüstan Mərkəzi Dövlət arxivinin məlumatlarına əsaslanan Yenikolopov da təsdiq edir.[34] Lakin Rusiya Hərbi Tarix arxivinin 1828-ci il 26 may tarixli məlumatında Qarabağa köçürülənlən ermənilərin 279 ailə, İrəvana isə 948 ailədə ibarət olduğu bəlli olur.[35]
Ermənilərin İrəvana köçürülməsi haqda qraf Paskeviçin Debiçə göndərdiyi 22 sentyabr – 29 noyabr 1828-ci il tarixli məlumatında İrandan köçürülən ermənilərin mümkün qədər ayrıca kəndlərdə yerləşdirilməsi tələb olunurdu. Onların azərbaycanlılar yaşayan kəndlərə yerləşdirilməsi və azərbaycanlı əhali ilə qarışdırılması məqsədəuyğun bilinmirdi. Baş verə biləcək ziddiyyətlərin qarşısının alınması üçün bəzi Azərbaycan kəndlərinin boşaldılması və onların əhalisinin azərbaycanlıların çox yaşadığı bölgələrdə cəmləşdirilməsi məsləhət bilinirdi.[36]
Bundan əlavə, Paskeviç tələb edirdi ki, köçürülənlərin İrəvan ətrafında yerləşdirilməsi ilə bərabər Naxçıvan əyalətində, Qafan və Mehri ətrafında məskunlaşdırılması da diqqət mərkəzində saxlanılsın.[37] Göründüyü kimi, çar Rusiyasının əsas məqsədi erməniləri bərabər şəkildə Osmanlı dövləti və Qacarlar İranı sərhədi boyunca yerləşdirilməsindən ibarət idi.
Paskeviçin Lazarevə verdiyi 19 maddəlik təlimatda göstərilirdi: “köçürülən xristianlardan ticarətlə məşğul olanlar şəhərlərdə yerləşdiriləcəklər ki, yenə ticarətlə məşğul olsunlar; kəndlilərə kifayət qədər münbit torpaq ayrılacaq və onlar 6 il müddətinə vergilərdən, 3 il müddətinə isə torpaq mükəlləfiyyətindən azad ediləcəklər; köçməyə hazır olan ailələrə veriləcək güzəştlər haqqında onlara xüsusi formada vərəqələr verilməlidir; köçürülənlər kəndlər üzrə dəstələrə ayrılmalı, hər dəstədə 150-dən 300-ə qədər ailə olmalıdır; köçürülənləri İrəvan və Naxçıvan əyalətlərinə istiqamətləndirmək lazımdır ki, həmin ərazilərdə xristian əhalisi mümkün qədər artırılsın; hər dəstəni müşayiət etmək üçün ermənicə bilən bir zabit və 2-5 kazak ayrılsın; köçkün dəstələri yola düşən kimi, dərhal İrəvan “müvəqqəti idarə”sinə ailələrin sayı, onların yaşadıqları ərazinin iqlim şəraiti, məşğuliyyətləri, malik olduqları sürülər və sərhəddə yetişəcəkləri təxmini vaxt haqqında xəbər göndərmək lazımdır. Kasıb ailələrə 10 gümüş manatı keçməmək şərti ilə köməklik göstərmək üçün 25 min rubl gümüş pul ayrılsın”. [38]
Paskeviçin İrəvan “müvəqqəti idarə”sinə göndərdiyi 18 bənddən ibarət digər təlimatinda isə göstərilirdi ki, “Komitə köçürülən ailələrin sayına uyğun torpaq sahəsi ayırmalı və onların nəzərdə tutulan yerlərdə məskunlaşmasına rəhbərlik etməlidir. Komitə çalışmalıdır ki, köçürülən kəndlərin sakinləri əvvəlki ərazilərindəki kimi, yığcam şəkildə ayrıca və bir-birinə qonşuluqda yerləşdirilsinlər. Dağlıq şəraitində yaşayanlar dağlıq yerdə, düzənlikdə yaşayanlar isə düzənlikdə yerləşdirilməlidir ki, onlar mümkün qədər xəstəlik və ölümdən xilas olsunlar, onların adət-ənənələrinin və təsərrüfat vərdişlərinin saxlanılmasına şərait yaradılsın. Müsəlmanların yaşadıqları kəndlərdə xristianların yerləşdirilməsinə yol verməməli, xristianlardan ibarət ayrıca dairə və mahallar yaratmaq lazımdır. Müsəlman (xristian) kəndlərinin əhatəsində yaşayan xristianları (müsəlmanları) öz dindaşlarının yanına köçürmək lazımdır.[39]
Bundan başqa, köçürülənlərin mülkədar torpaqlarında deyil, dövlət torpaqlarında yerləşdirilməsi nəzərdə tutulurdu. Yeni məhsul götürülənədək ilkin taxıl səpini üçün köçürülənlərə bərabər miqdarda borc verilməli, təsərrüfatın dirçəldilməsi üçün götürülən borc faizsiz olaraq, dörd il müddətinə verilməli, bundan sonra altı il ərzində ödənilməlidir. Məskunlaşdırmaq üçün yer seçərkən sağlamlıq üçün şərait və yaxşı içməli suyun olması nəzərə alınmalıdır. Hər bir ailənin yerləşdirilməsi haqqında xüsusi formada hesabat verilməli və hesabatda çəkilən ümumi xərclərin miqdarı göstərilməlidir”.[40]
Az keçməmiş bütün təlimatların köçürmədə könüllülük prinsipinin əsas tutulması barədə tələbləri tamamilə pozuldu. Belə ki, Qazaros Lazaryan və onun yerlərə göndərdiyi erməni nümayəndələri Türkmənçay müqaviləsini və onlara verilən təlimatı pozaraq erməniləri Şimali Azərbaycana könüllü deyil, zorla köçürməyə başladılar.
Rusiyanın bufer erməni dövləti yaratmaq siyasətini başa düşən Abbas Mirzə Rusiya ilə İranın yeni sərhədləri boyunca ermənilərin kütləvi surətdə yerləşdirilməsindən narahat idi. Buna görə də o, İrandan ermənilərin kütləvi surətdə köçürülməsinə mane olmağa çalışırdı. Bunun üçün Abbas Mirzənin nümayəndələri yerlərdə olur, ermənilərə köçmədikləri halda 6 il müddətinə vergilərdən azad ediləcəklərini vəd edirdilər.[41] Bundan əlavə, Abbas Mirzə özü iki dəfə Qazaros Lazaryana müraciət etmişdi ki, ermənilərin zorla köçürülməsi hallarına son qoysun və Türkmənçay müqaviləsinin şərtlərinə əməl etsin. [42] Abbas Mirzənin Qazaros Lazaryana göndərdiyi ikinci məktubunda erməni polkovnikin ikiüzlü siyasətinin açıq-aydın ifşa olunduğunu izləmək mümkündür: “İndi cənabınız Səlmasda qalır və qoşunlar da ordadır. Köçməyən kəndlərdən kazaklar və yasavullar vasitəsilə pul tələb edirsiniz, köçənlərə isə, eyni zamanda pul verirsiniz” [43] Qacarlar İranında yaşayan erməni əhalisinin işğal olunmuş Azərbaycan torpaqlarına zorla köçürülməsi onların öz içərisində də ciddi etirazlara səbəb olurdu. Səlmas monastırının yepiskopu İsrail erməni əhalisinin zorla köçürülməsinə maneçilik törətdiyi üçün erməni arxiepiskopu Nerses 1728-ci il martın 17-də general Paskeviçə yazdığı məktubunda generaldan xahiş etdirdi ki, İsraili bu işdən çəkindirmək üçün Xoydakı yerli komendanta göstəriş versin və onu rütbəsindən məhrum edərək cəzalandırmaq üçün Üçkilsəyə göndərsin.[44] Həmin il martın 19-da general Paskeviçin Nersesə cavab məktubunda bu xahişin yerinə yetiriləcəyi vəd olunurdu.[45]
Ermənilərin qacarlar İranı ərazisindən işğal edilmiş Azərbaycan torpaqlarına köçürülməsinin həyata keçirilməsi haqqında məlumatı Lazarevin 1829-cu il dekabrın 24-də qraf Paskeviçə yazdığı “Yekun hesabatı”nda izləmək mümkündür. Hesabata görə, köçürmə prosesi 1828-ci il fevralın 26-da başlanılmış və iyunun 11-də başa çatdırılmışdır. Bu qanlı siyasətin tezliklə həyata keçirilməsinə çox fəallıq göstərən göstərən erməni generalı Qazaros Lazaryan şəxsən özü rəhbərlik etmişdir. Digər erməni zabitləri – 41-ci yeger polkunun podpolkovniki knyaz Melikov Üzümçü və onun ətrafındakı kəndlərin, gürcü qrenadyor polkunun podpokovniki knyaz Arqutinski-Dolqoruki Təbriz və onun ətrafındakı kəndlərin, Səlmas əyalətinin kollec asessoru Qamazov Marağa və Urmiya xanlığı ətrafındakı kəndlərin, knyaz Şalikov isə Xoy xanlığında yaşayan ermənilərin Azərbaycanın Arazdan şimaldakı torpaqlarına köçrülməsində ona yaxından kömək etmişlər.[46]
Türkmənçay müqaviləsinə əsasən rus qoşunlarının geri çəkilmə prosesinə martın 8-dən etibarən Marağadan başlanıldığı üçün, ilk növbədə orada yaşayan erməniləri köçürmək nəzərdə tutulurdu. …Artıq martın 9-da general Paskeviç və “Müvəqqəti Azərbaycan İdarə Heyəti”nin üzvləri Təbrizi tərk etdilər. Abbas Mirzə yenidən Təbrizdə öz hakimiyyətini bərpa etdi. Lazarev isə vaxt itirmədən Təbrizin şimalındakı Sufiyan qəsəbəsinə – rus sərkərdəsinin yanına gələrək və köçürmə üçün yeni pul vəsaiti ayrılmasına icazə aldı.[47] Həmin il mayın 9-da Lazarevin Paskeviçə yazdığı rapotunda göstərilirdi ki, artıq 4500 erməni ailəsi köçürülərək, Araz çayının İran tərəfindəki sahilinə gətirilmişdir.[48]
Qazaros Lazaryan Türkmənçaya yaxın olan kəndləridə yaşayan ermənilərin hamısını keçmiş Qarabağ xanlığının ərazisinə yola salmış Səlmas və Qəzvin xanlıqları ərazisindən köçürülən ermənilər isə Marağadan köçürülən dəstələrə qoşulmuşdu.[49] 27 fevral 1828-ci il tarixli bir sənəddə ermənilərin Qacarlar İranından Rusiya tərəfindən işğal olunmuş keçmiş Azərbaycan xanlıqlarının ərazisinə köçürülməsi bir daha öz təsdiqini tapır.[50]
Köçürmə işlərinin ləngidiyini görən Qazaros Lazaryan 1828-ci il martın 30-da ermənilərə müraciət etdi. Müraciətdə deyilirdi: “Siz orada (yəni Şimali Azərbaycan torpaqlarında – G.N.) xristianların məskunlaşdırıldığı Yeni Vətən əldə edəcəksiniz … xristian torpağı haqqında düşüncələr sizi coşdurmalıdır. İranın müxtəlif əyalətlərinə səpələnmiş xristianların bir yerə cəmləşdiyini görəcəksiniz. Tələsin! Vaxt qiymətlidir. Tezliklə rus qoşunları İranı tərk edəcək, bundan sonra sizin köçməyiniz çətinləşəcək və biz sizin təhlükəsiz köçməyinizə cavabdeh olmayacağıq. Azca itkiyə məruz qalsanız da, qısa zamanda hər şeyə nail olacaqsınız, özü də həmişəlik”.[51] Lazarevin müraciətinin ermənicə mətni təcili olaraq İranda yaşayan bütün ermənilər arasında yayıldı.
Ermənilərin köçürülməsində həddindən artıq fəallıq göstərən Qazaros Lazaryan “1828-ci ilin aprel-may aylarında Marağa, Təbriz, Xoy, Səlmas, Urmiya, Dilman bölgələri ilə bərabər İran Kürdüstanı adlandırılan ərazidə yaşayan ermənilərin də Rusiya tərəfindən yenicə işğal edilmiş vilayətlərə (Azərbaycan torpaqlarına – G.N) köçürülməsini təmin etdi”.[52]
Rusiya hakim dairələri Qacarlar İranı ərazisindən köçürülən ermənilərin daha çox işğal olunmuş İrəvan xanlığı ərazisində məskunlaşdırılmasına xüsusi əhəmiyyət verirdi.[53] Qazaros Lazaryan 1828-ci il mayın 27-də general Paskeviçə göndərdiyi məlumatında 500 ailədən ibarət müsəlman kürdünün də İran Kürdüstanından İrəvan əyalətinə köçmək istədiyini bildirmişdi. Lakin erməni zabitinin bu planı baş tutmadı. Çünki hələ fevralın 29-da Lazarevə xüsusi məktubla tapşırılmışdı ki, müsəlmanların köçürülməsinə imkan verməsin.[54]
Lakin Rusiya imperiyası Qacarlar İranı ərazisində yaşayan ermənilərin köçürülməsi ilə kifayətlənməyərək, oradakı digər xristian təbəələri işğal olunmuş İrəvan xanlığı ərazisinə köçürməyə çalışdı və bu siyasət sonrakı dövrlərdə də davam etdirildi. Rusiya arxivlərindən əldə etdiyimiz materiallarda 1832-ci ildə Qacarlar İranı ərazisində yaşayan digər xristian tayfaların da ”Erməni vilayəti”nə köçürülməsini izləmək mümkündür.[55]
Lazarevin özünün hesabatından isə məlum olur ki, üç ay yarım ərzində İran ərazisindən 8249 erməni ailəsi İrəvan, Naxçıvan və Qarabağ əyalətinə köçürülmüşdü, bu da ən azı 40 min nəfər demək idi; köçürmə işlərinə xəzinədən 14000 manat qızıl, 400 manat gümüş pul xərclənmişdi; köçmək istəyən 1500 erməni ailəsi İranda qaldı. Çünki, Lazarev köçürmə üçün ayrılan vaxt başa çatdığından onları köçürməyə imkan tapmamışdı.[56]
Lakin nəzərə almaq lazımdır ki, Lazarevin hesabatında İrandan Şimali Azərbaycan torpaqlarına köçürülən erməni ailələrinin miqdarı tam dolğunluğu ilə əks olunmamışdır. 1832-ci ilə aid rusdilli arxiv sənədlərində Qacarlar İranı ərazisində yaşayan ermənilərin ”Erməni vilayəti”nə köçürülülməsinin hələ də davam etdiyini izləmək mümkündür.[57] Məhz buna görədir ki, rus tədqiqatçısı N.A.Smirnov İrandan 90 min nəfər erməninin köçürülərək Azərbaycan torpaqlarında məskunlaşdırıldığını yazmışdır.[58]
Köçürmənin həyata keçirilməsi ilə yanaşı eyni zamanda azərbaycanlıların öz dədə-baba torpaqlarından sıxışdırılması prosesi gedirdi. 1827-1728-ci illərdə Naxçıvan əyalətində yaşayan 4600 ailədən böyük əksəriyyəti – 4170-ni azərbaycanlı ailələri təşkil edirdi. Ermənilərin əyalətdə məskunlaşdırılması gedişində 1400-ə yaxın azərbaycanlı ailəsi Naxçıvanı tərk etmiş və 1832-ci ildə 90 faizdən 60 faizə düşmüşdür.[59]
Ümumiyyətlə, İ.Şopenin məlumatına görə, İrandan köçürülən ermənilərdən 366 ailə (1715 nəfər) İrəvan, 265 ailə (1110 nəfər) Naxçıvan və 36 ailə (182 nəfər) Ordubad şəhərlərində yerləşdirildi.[60] Köçürülən ermənilər İrəvan əyalətinin 119 kəndində, Naxçıvan əyalətinin 61 kəndində, Ordubad dairəsinin 11 kəndində məskunlaşdırıldı. Ümumiyyətlə, İrəvan əyalətində 4559 (23568 nəfər), Naxçıvan əyalətində 2137 (10652 nəfər), Ordubad dairəsində 250 (1340 nəfər) erməni ailəsi yerləşdirildi. Nəticədə, qondarma “Erməni vilayəti”nə 35560 nəfərdən ibarət 6949 erməni ailəsi köçürüldü.[61]
H.Verdiyevanın hesablamalarına görə isə, 1828-1830-cu illərdə Qarabağ əyalətinə 3 min erməni ailəsi, İrəvan əyalətinə 1395 ailə köçürülmüşdü. Naxçıvan əyalətinə isə 2285 ailə köçürülmüşdü. Ümumiyyətlə 1828-1830-cu illərdə Şimali Azərbaycana 21010 erməni ailə, yəni 119,5 min nəfər köçürülmüşdü. Əgər Türkmənçay müqaviləsinə qədər İrəvan əyalətində cəmi 22500 erməni yaşayırdısa, sonrakı iki ildə onların sayı üç qat artmışdı.[62]
Lazeryevin tapşırığını yerinə yetirən Qamazov öz hesabatında bildirirdi ki, İrəvan əyalətinə köçürülən ermənilərin əksəriyyəti buranın ən yaxşı mahalarında – Şərur, Dəvəli, Gərniçay, Zəngi, Abaran, Qırxbulaq, Dərəçiçək və Araz çayının İran tərəfində yerləşən hissəsindəki Səəd Çuxurunda (Çuxursəd), yəni Sürməli mahalında yerləşdirildi. 300 dən artıq sənətkar erməni ailəsi İrəvanda yerli şəhərlilərin – azərbaycanlıların evlərində yerləşdirildi.[63]
Səlmas və Xoy xanlıqlarından köçürülən 200-dək erməni ailəsi isə İ.Arqutinskinin göstərişi ilə Sürməli mahalına göndərildi.[64] Beləliklə, İrandan köçürülən ermənilər İrəvan, Naxçıvan və Ordubad şəhərlərində (Naxçıvanda – Dərələyəz, Şərur, Naxçıvan və Azadciran şəhərində; İrəvanın mərkəzi mahallarında – Gərnibasar, Zəngibasar, Dərəçiçək, Qərbibasar, Abaran və b. yerlərdə) məskunlaşdırıldılar.[65] İlkin qaynaqlara əsaslanan M.İsmayılov da Türmənçay müqaviləsinə əsasən Qarabağ, İrəvan və Yelizavetpol bölgəsinə köçürülən ermənilərə bu yerlərin ən yaxşı torpaqlarının verildiyini təsdiq edir.[66]
Köçürülənlərin dövlət torpaqlarında yerləşdirilməsi haqqında Paskeviçin verdiyi təlimata baxmayaraq, ermənilərin əksəriyyəti Azərbaycan mülkədarlarına məxsus torpaqlarda yerləşdirildi. Özü də ermənilərə bu zaman yaylaqlarda olan azərbaycanlıların evləri paylandı. Yaylaqlardan qayıdan azərbaycanlılar isə ev-eşiksiz qaldı. Bunu hətta mənşəcə erməni olan rusdilli müəlif İ.Yenikolopov da təsdiq edərək öz əsərində yazırdı: “Türkmənçay müqaviləsi imzalanandan sonra ayrı-ayrı qrupların köçürülməsi eybəcər formada həyata keçirilməyə başlandı: xüsusi torpaq fondu ayrılmadığından yeni əhalinin (yəni ermənilərin – G.N.) əksəriyyəti yaylaqda olan kəndlilərin (Azərbaycan türklərinin – G.N.) evlərində yerləşdirildi”.[67]
Bundan başqa, müəllifi A.Qiboyedov olduğu ehtimal edilən “Ermənilərin İrandan bizim vilayətlərə köçürülməsi haqqında qeydlər”də göstərilir ki, “ermənilərin mülkədar torpaqlarında yerləşdirilməsi, onların müsəlmanların yerini dar etməsi bir yana, hələ üstəlik onlara güzəştlər də verildi. Halbuki, ziyan çəkən tərəf müsəlmanlar idi. Əslində, erməniləri deyil, buranın müsəlmanlarını köçkün hesab etmək lazımdır. Çünki müharibə zamanı İrəvanın Sərdarı onları döyüş meydanından köçürmüşdü və ən kasıb vəziyyətdə yaşayırdılar. Ermənilər köçürülən zaman müsəlman ailələrinin əksəriyyəti yaylaqda idi və gəlmə ermənilərin onların evlərində yerləşdirilməsindən xəbərləri yox idi”.[68]
Qafqaqz Arxeoqrafiya Komitəsinin verdiyi məlumatda A.Berje heç bir mənbəyə əsaslanmadan bu yazıların A.Qriboyedoba məxus oldunu göstərir. Qafqaz Toplusunun XXX cildində bu yazıların A.Qriboyedoba məxus olması fikri təkrar olunur. Lakin Rusiya imperiyasının erməniləri Şimali Azərbaycan torpaqlarına köçürməsi siyasətinin tərəfdarı və bu siyasətin həyata keçirilməsində mühüm rol oynayan, ermənipərəst A.Qriboyedovun gerçək tarixi əks etdirən bu yazının müəllifi olması qeyri-real görünür. Məhz buna görə də İ.Yenikolopov verdiyi məlumatı daha düzgün hesab etmək olar. Rusdilli qaynaqlardan fərqli olaraq İ.Yenikolopov öz əsərində Ermənistan SSR Mərkəzi Dövlət arxivində saxlanılan sənədlərə əsasən Rusiya hökumətinin bu qanlı siyasətini açıqlayan həmin yazıların İ.Qriboyedova deyil, xüsusi məqsədlə göndərilən ali təhsilli hərbçi-jurnalist D.E.Zubarevə məxsus olduğunu göstərir. Bundan əlavə, müəllifin verdiyi məlumata görə, D.E.Zubarev 1829-cu ilin mayında köçürmə komitəsini tənqid edərək yazırdı ki, heç bir yerdə lazım olan informasiyanı əldə etmək mümkün deyil. Mülklərin kimə məxsus olduğu bəlli deyil. O, öz mülahizələrində müəyyən edir ki, köçürülüb gətirilən ermənilərin əksəriyyəti əkinçilər və sənətkarlardır. Lakin köçürülənlərin sayı barədə lazımı qeydiyyat aparılmayıb.[69]
İlk mənbələrin məlumatından görünür ki, İrandan köçürülən ermənilərin əksəriyyəti, bu barədə verilmiş təlimatların əksinə olaraq, müsəlman kəndlərində yerləşdirilmişdi. Bundan əvvəl köçürülmüş ermənilərin müsəlmanlarla qarışıq yaşadıqları kəndlərdə isə, demək olar ki, yeni köçkünlər yerləşdirilmədi. Təbiidir ki, torpaqlarının və evlərinin əllərindən alınması Azərbaycanlı əhalinin kəskin narazılığına səbəb olurdu. Naxçıvan kəndlərində bu cür narazılıqlar daha tez-tez baş verirdi. Odur ki, Qriboyedov vəziyyətdən çıxış yolu kimi, Naxçıvan əyalətində müsəlmanlar yaşayan kəndlərdə məskunlaşdırılmış 500 erməni ailəsini Dərələyəzə köçürməyi təklif etdi. Onun bu təklifi həyata keçirildi.[70]
Hətta, köçürmə komissiyasının sədri İ.Qriboyedovun özü belə köçürmə prosesini mənfi qiymətləndirmiş və ermənilərin dövlət torpaqlarında deyil, əsasən müsəlmanlara – mülkədarlara və müsəlman kəndlilərinə məxsus olan torpaqlarda yerləşdirildiklərini və onların burada müsəlmanları sıxışdırdıqlarını qeyd edirdi.[71]
Ümumiyyətlə, çar Rusiyasının erməniləri Qacarlar İranı ərazisindən Şimali Azərbaycan torpaqlarına köçürməsinin reallaşması yəni, Turkmənçay sülh müqaviləsinin XV maddəsinin icrası ilə bağlı bölgədə baş vermiş proseslər erməni tarixşünaslığında mahiyyət etibarilə təhrif edilmiş şəkildə təqdim olunur. Məsələn, erməni tarixçisi V.Parsamyan ermənilərin köçürülməsi ilə bağlı yazırdı: “Turkmənçay müqaviləsi ermənilərə ilk dəfə imkan verdi ki, vətənə (?) qayıtsınlar, Rusiyanın hakimiyyəti altına toplaşsınlar və az-çox münasib həyat şəraiti qursunlar. Erməni xalqı bu müqaviləni böyük məmnuniyyətlə qəbul etdi”.[72] Göründüyü kimi, erməni müəllifi Rusiya imperiyası sarayında planlaşdırılan, daha çox Rusiyanın özünə lazım olan bu siyasəti təhrif edərək ermənilərin çoxəsrlik arzuları kimi qələmə verməyə, ermənilərin milli dövlət qurmaq istəkləri ilə bağlamağa çalışır. Qeyd etdiyimiz kimi, çar Rusiyası Qacarlar İranı və Osmanlı Türkiyəsi ilə sərhədində bufer xristian zolağı yaratmaq siyasətinin nəticəsi idi.
Lakin çar Rusiyanın işğal etdiyi Şimali Azərbaycan torpaqlarına erməniləri köçürməkdə məqsədinin onlara dövlət yaratmaq olduğunu rus müəlliflərinin özləri də etiraf edirlər. Bu səbəbdəndir ki, S.Qlinka ermənilərin köçürüldüyü Azərbaycan torpaqları haqda yazırdı: “bu ərazilər…yer üzünə səpələnmiş erməni tayfalarını başına toplayacaq və I Nikolayın xoşbəxt dövlətinin himayəsində erməni çarlığı öz şöhrəti və bütün xatirələri ilə dirçələcək”.[73]
Təqribi hesablamalara görə ermənilərin köçürülməsi İrana, əsasən Cənubi Azərbaycana 32 mln. man. ziyan vurmuşdu. Köçürmə prosesinin bütün ağırlığı yerli əhalinin üzərinə düşmüş, onların vəziyyətini kəskin şəkildə pisləşdirmişdi. Köçürülmə Şimali Azərbaycanda da azərbaycanlıların məhsuldar torpaqlarının əllərindən çıxması ilə nəticələnmişdi. Köçürmənin xərcləri demək olar ki, Azərbaycanın hesabına həyata keçirilmişdi.[74] Hətta, Qacarlar İranından ermənilərin Şimali Azərbaycana köçürülməsində fəallıq göstərən hərbçilər və din xadimləri Rusiya imperiyası tərəfindən mükafatlandırıldılar.
Ermənilərin İrandan və Türkiyədən Şimali Azərbaycan torpaqlarına köçürülüb gətirilməsi inkarolunmaz tarixi faktdır. Bunu çoxsaylı arxiv materialları, xüsusilə ermənilərin köçürülməsi prosesini tənzimləyən rəsmi dövlət sənədləri – təlimatlar çox aydın sübut edir. Ermənilər Şimali Azərbaycan torpaqlarına xüsusi məqsədlə, yəni onlara daimi vətən yaratmaq niyyəti ilə köçürülürdü. Bu çirkin siyasətin həyata keçirilməsində Rusiya ordusunda xidmət edən erməni zabitləri fəal iştirak edirdilər. Erməni generalları öz məqsədlərini açıq bəyan etməkdən də çəkinmirdilər. Daim köçəri həyat sürməyə, yerdəyişmələrə adət etmiş ermənilərə bu dəfə təlqin edilirdi ki, “İran çörəyi yeməkdənsə rus otu yemək daha yaxşıdır”.[75]
Maraqlı və təkzibolunmaz tarixi faktlardan biri də budur ki, tanınmış rus rəssamı V.İ.Maşkov 1828-ci ildə ermənilərin Şimali Azərbaycan torpaqlarına köçürülməsinə ayrıca rəsm əsəri həsr etmişdi.
Qarabağ erməniləri 1978-ci ildə özlərinin İrandan bura, yəni Qarabağa köçürülməsinin 150 illiyini bayram etmiş, bu münasibətlə Dağlıq Qarabağda – Ağdərə rayonunun Marquşevan kəndində bir xatirə abidəsi də inşa etmişdilər. 1988-ci ildə erməni separatçı-terrorçu dəstələri “tarixi həqiqətin izini itirmək” məqsədilə ermənilərin Qarabağa gəlmə etnos olduğunu təsdiq edən bu abidəni dağıtmışlar. Hazırda həmin abidənin qalıqları Azərbaycan Respublikasının Ağdərə rayonu ərazisindədir. [76]
Göründüyü kimi, Rusiya imperiyasının erməniləri kütləvi şəkildə Qacarlar İranından Şimali Azərbaycan torpaqlarına köçürməsi siyasəti həm çarizmin imperiyanın İranla sərhədində özünə etnik və sosial dayaq yaratmaq siyasətini əks etdirir və həm də, azərbaycanlıların öz ata-baba torpaqlarından sıxışdırıb çıxarmaq məqsədini güdürdü. Bundan əlavə, bu qanlı siyasətin həyata keçirilməsi həm də “erməni dövləti”nin yaradılmasına hazırlıq idi. Tarixi hadisələrin sonrakı gedişi bir daha sübut etdi ki, İran erməniləri Şimali Azərbaycana xüsusi məqsədlə – onlara burada “Yeni Vətən” yaradılması məqsədilə köçürülmüşdü.
[1] Mahmudov Y.M. “Azərbaycan xalqının İrəvan və ətrafındakı torpaqlara tarixi varislik hüququ bərpa olunmalıdır. (Azərbaycan, ingilis və rus dillərində). Bakı, 2015, s.5.
* Üçkilsə və ya Üçmüədzin qədim Azərbaycan-Alban monastırı idi. Üçmüədzin sözünün tərkibindəki “üç” sözü Azərbaycan türkcəsində say, “müədzin” isə ərəb dilində azan verən, vəzifələndirilən anlamındadır.
[2] Սիմէօն Երեիանցի: Ջամբռ: Գիրք, որ կոչի յիշակարան արձանացռւցիչ, հայելի եւ պարռւնակող բնավից որպիսռւթեանց Սրբոյ Աթոռոյս, եւ իւրոյ շրջակայից վանօրէիցն: Վաղարշապատ: ՌՀԻԳ: էջ:100 (Simeon İrəvanlı. Cambr. Müqəddəs Üçmüədzin kilsəsinin və ətraf monastırlar toplusunun müffəssəl aynası və xatirə kitabı. Vaqarşapad, 1873, s.100).
[3] Bax: İrəvan xanlığı. Rusiya işğalı və ermənilərin Şimali Azərbaycan torpaqlarına köçürülməsi. (Y.M.Mahmudovun rəhbərliyi ilə kollektiv monoqrafiya). Bakı, 2010.
[4] Bax: Армяно-русские отношения в первой трети XVIII века. (Сб. документов. Под ред., А.Иоаннисяна), т.II, ч.I, Ереван, 1964, c.35; Nəcəfli G.C. XVIII əsrdə Azərbaycan ərazisində erməni dövləti yaradılması cəhdləri. Bakı, 2007, s.31.
[5] Bax: Kemani Mustafa Ağa. Revan Fethnamesi. // M.Münir Aktepe. 1720-1724 Osmanlı-İran münasеbetleri. İstanbul, 1970, s.22, 50, 61.
[6] Kemani Mustafa Ağa. Revan Fethnamesi.., s.54-55.
[7] Kemani Mustafa Ağa. Revan Fethnamesi.., s.111; İrəvan xanlığı. Rusiya işğalı və ermənilərin, s.45
[8] Gəncə-Qarabağ əyalətinin müfəssəl dəftəri. (Ön söz, tərcümə, qeyd və şərhlərin müəllifi Hüsaməddin Məmmədov (Qaramanlı). Bakı, s.16.
[9] Գրիգորյան Վ.Ռ. Երեվանի խանությունը 18-րդ դարի վերջում: Երեվան, 1958: էջ: 109 (Qriqoryan V.R. İrəvan xanlığı XVIII əsrin sonlarında (1780- 1800), Yerevan, 1958, s.109); Наджафли Г.Дж. Азербайджан в XVIII-XIX веках. Бишкек, 2010, c.34.
[10] РГВИА, ф.52, оп.1/194, дело 331, ч.5., л.л.2,4.
[11] Наджафли Г.Дж. Азербайджан в XVIII-XIX.., c.34-35.
[12] Акты, собранные Кавказской Археографической Комиссией (АКАК), (издан под ред. председателя комиссии А.Д.Берже), т. VI. ч.I,Тифлис, 1874, док. 1356, c.885.
[13] АКАК, (издан под ред. председателя комиссии А.Д.Берже), т.II. Тифлис, 1868, док.1436, c.703.
[14] Bax: Гарабаг: Кюрекчайский договор – 200. Баку, 2005.
[15] Ениколопов И. Грибоедов и Восток. Ереван, 1954, с.128-129.
[16] Ениколопов И. Грибоедов и Восток.., c.128-130.
[17] РГВИА, ф.846, оп.16. док.4329. ч.3. л.л.164-164об; л.166.
[18] Bax: Полное собрание законов Российской империи (ПСЗРИ), Собр. второе, т.III. СПб., 1830, №1794, 123-130.
[19] ПСЗРИ. Собр. второе, т.III., №1794, 130; Mahmudov Y.M., Şükürov K.K. Qarabağ: Real tarix, faktlar, sənədlər. Bakı, 2005, s.31.
[20] Mahmudov Y.M., Şükürov K.K. Qarabağ: Real tarix.., s.31.
[21] Грибоедов А.С. Записка о переселении армян из Персии в наши области // Соч. в двух томах, т.II. Москва, 1971, c.339-341; Şükürov K.K. Türkmənçay – 1828: Tarixi xronika. Bakı, 2006, s.85-86.
[22] Neumann F. Geschichte der Übersiedlung von vierzigtausend Armeniern, welche im Jahre 1828 aus den persischen Provinz Adarbaidschan nach Russland auswanderten. Leipzig, 1834, S.41.
[23] Тавакалян Н.А. Переселение армян из Персии и Турции в Закавказье после присоединения Восточной Армении к России. // Историко-филологический журнал АН Арм. ССР. Ереван, 1978, №3(82), с.27.
[24] Глинка С. Описание переселения армян адербиджанских в переделы России. Баку, 1990 (переизд..), c.38-40; İrəvan xanlığı. Rusiya işğalı və ermənilərin…, s.381.
[25] Ениколопов И. Грибоедов и Восток.., c.129.
[26] Парсамян В.А. А.С.Грибоедов и переселение армян. // Из истории вековой дружбы. Ереван,1983, c.136-137.
[27] Семенов Л.С. К вопросу о значении Туркманчайского договора для истории Армении. // Историко-филологический журнал АН Арм. ССР. Ереван, 1959, №4, с.108.
[28] Ениколопов И. Грибоедов и Восток.., c.129-131.
[29] РГВИА, ф.846, оп.16. док. 978, л.л.19-20; АВПРИ, ф.194, оп.1(528а), “Миссия в Персией” 1809-1913 гг. док.4; Nəcəfli G.C. Ermənilərin İrandan Şimali Azərbaycan torpaqlarına məqsədyönlü şəkildə köçürülməsi (yeni qaynaqlar işığında). // Bakı Universitetinin Xəbərləri (humanitar elmlər seriyası), №03, Bakı, 2015, s.70.
[30] РГВИА, ф.846, оп.16. док.978, л.102.
[31] АКАК, т.VII, док. 553, с.595; д.561, с.603-604; İrəvan xanlığı. Rusiya işğalı və ermənilərin…, s.381-382.
[32] РГВИА, ф.846, оп.16. док.978. л.1, л.л.3-3об; л.л.4-4об; л.л.5-5об; л.6.
[33] Тунян В.Г. «Защитник отечества» – каталикос всех армян Нерсес Аштаракеци. 1826-1857 гг. Ереван, 2007, c.70.
[34] Bax: Ениколопов И. Грибоедов и Восток.., c.129-130.
[35] РГВИА, ф.846, оп.16. док.978. л.114; Nəcəfli G.C. Ermənilərin İrandan…, s.73-74.
[36] РГВИА, ф.846, оп.16. док.979. л.л.1-1об; л.л.2-2об; л.л.3,4-4об; л.л.9-9об; л.л.22-22об.
[37] Развитие Еревана после присоединения Восточной Армении к России. (Сб. док.) Ереван, 1978, c.189-191.
[38] Bax: Глинка С. Описание переселения.., c.99-107; Neumann F. Geschichte der Übersiedlung.., S.80-86; İrəvan xanlığı. Rusiya işğalı və ermənilərin.., s.382.
[39] РГВИА, ф.846, оп.16. док.978. л.6об; л.л.7-7об; л.л.8-8об; л.л.9-9об; Nəcəfli G.C. Ermənilərin İrandan…, s.71.
[40] Развитие Еревана после.., c.189-191; Arzumanlı V., Mustafa N. Tarixin qara səhifələri. Deportasiya. Soyqırım. Qaçqınlıq. Bakı, 1998, s.26; İrəvan xanlığı. Rusiya işğalı və ermənilərin.., s.382-383.
[41] АКАК, т.VII, док.586, с.619-620.
[42] Bax: Глинка С. Описание переселения.., c.66-67,76-78; Neumann F. Geschichte der Übersiedlung.., S.58-59, 65-66.
[43] Глинка С. Описание переселения, c.78; Neumann F. Geschichte der Übersiedlung.., S.66.
[44] АКАК, т.VII, док.568, с.607-608; док.561,c.603-604.
[45] АКАК, т.VII, док.569, с.608; İrəvan xanlığı. Rusiya işğalı və ermənilərin.., s.384.
[46] Глинка С. Описание переселения, c.48, 55, 63, 69, 115-116; Neumann F. Geschichte der Übersiedlung.., S.47, 51, 57, 60, 93-94.
[47] Neumann F. Geschichte der Übersiedlung.., S.51-52; Nəcəfli G.C. Ermənilərin İrandan…, s.73-74.
[48] АКАК, т.VII, док.592, с.624.
[49] Bax: Neumann F. Geschichte der Übersiedlung.., S. s.51-53.
[50] РГВИА, ф.846, оп.16. док.4338. л.л.69-69об; л.л.70-70об; л.л.71-71об; л.л.72-72об.
[51] Глинка С. Описание переселения.., c.107-111; Neumann F. Geschichte der Übersiedlung.., S.87-89; İrəvan xanlığı. Rusiya işğalı və ermənilərin.., s.386.
[52] Bax: Neumann F. Geschichte der Übersiedlung.., S.54-55.
[53] РГВИА, ф.846, оп.16. док.4329, ч.5, л.224, л.л.288-288об.
[54] АКАК, т.VII, док.598, с.629; İrəvan xanlığı. Rusiya işğalı və ermənilərin.., s.387.
[55] АВПРИ, ф.194, оп.1(528а), “Миссия в Персией” 1809-1913 гг. док.106.
[56] Глинка С. Описание переселения.., c.131; İrəvan xanlığı. Rusiya işğalı və ermənilərin.., s.388.
[57] АВПРИ, ф.194, оп.1(528а), “Миссия в Персией” 1809-1913 гг. док.152.
[58] Смирнов Н.А.Политика России на Кавказе XVI-XIX веках. Москва, 1958, c.180.
[59] Григорьев В. Статистическое описание Нахичеванской провинции. СПб, 1833, с.30.
[60] Шопен И. Исторический памятник состояния Армянской области в эпоху присоединения к Российской империи. СПб., 1852, c.636-638.
[61] Шопен И. Исторический памятник.., c.636-638; Arzumanlı V., Mustafa N. Tarixin qara səhifələri…,, s.31-32.
[62] Вердиева Х. Переселенческая политика Российской Империи в Северном Азербайджане (XIX начале XX вв.). Баку, 1999, c.91-113.
[63] Ениколопов И. Грибоедов и Восток.., c.135-136; Məmmədova İ. XIX əsrin əvvəllərində Rusiyanın Azərbaycanda etnodemoqrafik vəziyyəti dəyişmək siyasətinin Azərbaycanın sonrakı taleyinə təsiri. // Tarix və gerçəklik (Azərbaycan tarix qurumu). Bakı, 2008, №1(3), s.94.
[64] Ениколопов И. Грибоедов и Восток.., c.141; Məmmədova İ. XIX əsrin əvvəllərində.., s.94.
[65] Воронов Н.И. Данные об армянском население в России А.Д.Еритсова. // ИКОИРГО, т.VII, Тифлис, 1882-1883, c.93; İrəvan xanlığı. Rusiya işğalı və ermənilərin.., s.388.
[66] İsmaiylov M. Karabakh under Russian rule. \\ History – Visions of Azerbaijan Magazine. Summer 2007. Volume 2.3. P.34-42.
[67] Ениколопов И. Грибоедов и Восток.., c.135.
[68] АКАК, т.VII, док.618, с.642-644; İrəvan xanlığı. Rusiya işğalı və ermənilərin.., s.389.
[69] Ениколопов И. Грибоедов и Восток.., c.140.
[70] АКАК, т.VII, док.623, с.647-648.
[71] АКАК, т.VII, док.618, с.642.
[72] Парсамян В.А. История армянского народа 1801-1900 гг. книга первая. Ереван, 1972, с.49; Süleymanov M. Erməni millətçiliyi və təcavüzkarlığı tarixindən. Bakı, 2008, s.375.
[73] Глинка С. Описание переселения.., c.92.
[74] Şükürov K. Türkmənçay.., s.94.
[75] Глинка С. Описание переселения.., c.68-69; İrəvan xanlığı. Rusiya işğalı və ermənilərin.., s.24.
[76] İrəvan xanlığı. Rusiya işğalı və ermənilərin.., s.28.